Máis alá do ensino

Charla de persoas relacionadas coa facultade de Ciencias da Comunicación da USC que nos veñen falar dos seus pasos pola industria audiovisual, reflexionando sobre o que hai máis alá do ensino: como chegaron a dar clase? Que proxectos desenvolveron? Como decidiron o que querían facer ao rematar de estudar? Que impresións lles causou o ámbito profesional?

Para isto, contaremos coa presenza de catro persoas que nos permitirán, a través das súas experiencias persoais, achegarnos un pouco máis ás posibilidades que oferta o sector audiovisual e aos proxectos que se están desenvolvendo.

Sobre Gaspar Broullón

Licenciado pola Universidade de Santiago de Compostela no seu momento, actualmente é profesor de Realización Audiovisual na Facultade de Ciencias da Comunicación. No sector laboral desenvolve traballos como produtor, montador e realizador. Foi montador da serie Auga Seca (2020) e Hierro (2019), pola que gañou un premio Mestre Mateo. Creou, xunto a Jorge Coira e Pepe Coira, a produtora audiovisual Ollo Vivo, baixo a que se desenvolveron proxectos como Eroski Paraíso (2019).

Sobre Antonio Mourelos

É licenciado en Ciencias da Información na rama de Imaxe e Son. Os seus inicios foron na radio. Foi responsable da Filmoteca de Galicia, cando estaba encadrada no Arquivo da Imaxe. No ano 85 empezou a dedicarse profesionalmente ao mundo da dobraxe como actor e director de maneira ininterrompida ata o ano 2000, onde iniciou a súa traxectoria como actor de pantalla participando nunhas 50 produccions entre cine e televisión. Entre 2011 e 2015 foi presidente da Academia Galega do Audiovisual. Desde o 2003 é tamén profesor asociado na USC e actualmente a súa faceta profesional encamíñase principalmente ao mundo da actuación e a dirección teatral.

Sobre Olaia Tubío

Olaia Tubío (Rois, 1994). Graduada en Xornalismo pola USC e Mestrado en Servizos Culturais pola mesma Universidade. Creadora e integrante do proxecto Punto e Volta, traballou como redactora na Televisión de Galicia e foi xornalista cultural no Progreso de Lugo. Tamén traballou como freelance para diversas entidades como o Concello da Coruña, a Central Folque ou o Museo do Pobo Galego. É creadora e codirectora do documental "Dorothé na Vila" (2020) e da serie documental "Galicia de 20 a 20".

Sobre Lucía Ramiro

Lucía Ramiro (Foz, 1997). Graduada en Comunicación Audiovisual pola USC. Fixo o Máster de Profesorado na mesma universidade, na que actualmente estuda o Máster de Estudos da Literatura e da Cultura.

Traballadora da sección de cinema en NUMAX. Coguionista e axudante de dirección do filme Os espazos en branco (en posprodución). Traballou en equipos de dirección e produción de curtametraxes e videoclips, entre eles Muinheira de interior (Boyanka Kostova, 2020) ou Haters (Dios Ke Te Crew, 2022). Foi meritoria de dirección do filme A cero.5 (2020) e axudante de produción de María Casares: A muller que viviu mil vidas (2022).